राजा ज्ञानेन्द्रले फेरी चहलखेलको रोल खेल्न सुरु गरेका छन् । अधिकारविहीन भइसकेका राजाले प्रजातन्त्र दिवसको अवसरमा दिएको भ्रामक अभिव्यक्तिले मुलुक र मुलुकवासीलाई पुनः एक पटक गम्भीर भएर सोच्न बाध्य तुल्याएको छ । राजा फेरी सक्रिय हुन खोज्दै छन् भन्ने कुरा उनको अभिव्यक्तिले स्पष्ट पारेको छ । राजाले तत्कालिन माघ १९ को कदम तत्कालिन परिस्थितिको बाध्यता र जनताको चाहना बमोजिम भन्दै लोकतन्त्र पक्षधरहरुलाई जिस्काउने काम गरेका छन् ।

राजाका अधिकार एकाएक कटौती हुँदै गइरहेको अवस्थामा राष्ट्र प्रमुखको हैसियत देखाउँदै वक्तव्य दिएर आठ दललाई समेत चुनौती दिएको अवस्था छ ।  उनले अन्तरिम संविधानको मर्म र भावना विपरीत वक्तव्य दिएर  आफू मालिक बन्ने चेष्टा गरेका छन् । संविधान विपरीत राजाको वक्तव्य आएको छ । आफनो १५ महिने बर्बर निरंकुश शासनको गुनगान गाउँदै दिएको अभिव्यक्तिले आम जनतालाई आक्रोशित तुल्याएको छ ।  नेपाली जनताका लागि यो कुनै पनि हालतमा स्वीकार्य छैन । यसैका विरोधमा देशव्यापी प्रदर्शन समेत भइसकेको छ । यता दलहरु राजालाई कार्वाही गर्ने निर्णय मात्र गर्छन् तर त्यसको कार्यान्वयन गर्न सक्दैनन् ।

लोकतन्त्रमा जनता मालिक भइसकेको अवस्थामा जनताभन्दा माथि उठेर उनले वक्तव्य दिएका छन् । आफू फेरी मालिक बन्ने कुचेष्टा गरिरहेका छन् । जनतालाई रैती बनाएर फेरी अर्को खेल खेल्ने योजनामा राजा लागेको देखिन्छ ।  राजाले जनतालाई जिस्काउने काम गरेका छन् । लोकतन्त्रको उपहास गर्ने काम गरेका छन् । जनआन्दोलन भाग-२ को विरोध बोलिरहेका छन् । संविधानसभाको निर्वाचन असफल बनाउने पहिलो प्रयासको रुपमा राजाले यस्तो वक्तव्य दिएका छन्। संविधानसभाको निर्वाचन भाँडेर मुलुकलाई निरंकुशतातर्फ फर्काउन राजा उद्दत भएको उनको जनभावना विपरीतको अभिव्यक्तिले छर्लङ्ग पारिदिएको छ ।

राजाले माघ १९ को कदमलाई वैधानिकता दिन खोज्दै लोकतन्त्रको अपहरण गर्ने चालबाजी सुरु गरेका छन् । राजाको चाल-चलनले पनि यही देखाइरहेको छ । उनी अझै पनि गलिसकेका छैनन् । अझै पनि मुलुक हत्ताउने सुरसारमा राजा लागेका छन् । मनखुशी वक्तव्य दिएर राजाले आफनो निरंकुश कदमलाई पुनः मलजल दिने काम गरेका छन् । आम जनता यसबाट विचलित भएका छन् । फेरी मुलुकमा प्रतिगमन निम्तने हो की भन्ने आंशका उत्पन्न भएको छ । मुलुकमा छाउन थालेको शान्तिको रेखालाई धुमिल बनाउने काम राजाबाट भएको छ ।

राजाको वक्तव्य कसरी आयो यसमा पनि ठूलो शंका र उपशंका उब्जाएको छ । निश्चित रुपमा राजाको वक्तव्य आउनुमा कुनै ठूलो शक्तिको हात पनि रहन सक्छ । राजाले कसैको आड पाएकाले साहस गरेर सन्देश दिएका हुन । वर्तमान राज्यसत्ताको नविनतम् सोच र परिकल्पना बाट राजा हतोत्साहित भएको पनि हुन सक्छ । त्यही भएर राजा अगाडि बढ्दै छन् । यसले लोकतन्त्रलाई खतराको गहिरो खाडमा पुर्याएको छ । चुप लागेर बसेका जनतालाई फेरी उमाल्ने काम राजाबाट भएको छ । तर उनको वक्तव्यलाई जनताले कुनै पनि हालतमा समर्थन जनाएका छैनन् । जनता आगो बनेर वक्तव्यको विरोधमा सडकमा उत्रेका छन् ।

राजाको यस्तो अभिव्यक्ति आउन्जेल सरकार के हेरेर बसेको थियो यसले पनि जनतालाई आश्चार्यमा पारेको छ । राजाले यति बोल्दासम्म पनि सरकार केवल राजाको वक्तव्य संविधान विपरीत  छ भनेर मात्र हिडेको छ । राजलाई कार्वाही गर्न पट्टि कुनै तदारुकता देखाएको छैन । कतै सरकारकै परामर्शमा राजाले यस्तो वक्ताव्य दिएका त हैनन भन्ने उपशंका पनि अर्कोतिर जन्माएको छ  । सरकारले यसवारे जनता समक्ष स्पष्ट पार्नेपर्छ । यो अवस्था सिर्जना गर्ने काम सरकारले पहिलेदेखि नै गर्दै आएको हो । सरकारकै कमजोरीको फाइदा उठाउँदै राजाले फेरी टाउको उठाएका छन् ।  अझै पनि राजा चुपचाप बस्ने अवस्था देखिदैन । पुरापुर अधिकारविहीन भइसकेका राजाले यस्तो दुष्साहस गर्दा पनि दलहरु गम्भीर हुन नसक्नु दुखकै कुरा मान्नुपर्छ । केवल राजाको वक्तव्य जनचाहना विपरीत भन्दै  नेताहरु हिडिरहेका छन् ।

लोकतन्त्रमा बाधक बन्न खोजेका राजाको अबको भुमिका के हो सबैलाई सोच्न बाध्य बनाएको छ । पृतनापतिले पोखरामा दिएको वक्तव्य र राजाले दिएको वक्तव्यले मुलुकमा ठूलै षड्यन्त्रको खेल सुरु भएको पुष्टि हुन थालेको छ । राजाले प्रतिगमनको गोटी फेरी चाल्ने चेष्टा गरेका छन् । दलहरुले समयमा सचेतता नपाउँदा राजा बलियो हुँदै गएका छन् । राजाको गोटी नै दलहरु बन्दै गएको पनि राजाले दिएको षड्यन्त्रपूर्ण सन्देशले स्पष्ट पार्छ ।
    राजालाई अब यसरी नै बोल्न दिने की राजालाई पूर्ण रुपमा शक्तिहीन बनाउने दलहरु सामु तत्काल देखिएको प्रमुख चुनौती यही हो । अझै पनि राजालाई ठाउँ दिनुपर्छ भनेर हिड्ने हो भने मुलुकलाई राजाले आफ्नो हातमा लिएर निश्चित रुपमा प्रतिगमन लादेर छाड्ने छन् । त्यसपछि दलहरुको अवस्था के हुने हो त्यसको नतिजाले नै देखाउने छ ।

यसर्थ पनि अब अब दलहरुले गम्भीर भएर सोच्नैपर्छ । धेरैपछि गएर सोच्ने हो भने मुलुक फेरी तानशाहको हातमा पुग्ने  छ । यो वास्तविकता हो । तत्काल गणतन्त्रको घोषणा गरेर राजालाई निलम्बन गर्नु बाहेकको अर्को विकल्प अहिले केही छैन । यदि यो भएन भने राजा पुन जाग्ने छन् । र मुलुकमा हैकम जमाउने छन् । र आम लोकतन्त्रप्रेमीहरुको हार हुनेछ । सहिदको रगत पनि त्यतिकै खेर जानेछ । यो हुन नदिनका लागि अब राजालाई बर्खास्त गर्नु बाहेक अरु विकल्प देखिँदैन